మీరు ప్రవహించాలంటే………  (Author: అయ్యలసోమయాజుల సుబ్రహ్మణ్యము)

మీ ఊరెళ్ళండి     వెళుతూ……. వెళుతూ…..

మీ దగ్గరున్న జ్ఞాపకాల్ని వెంట తీసుకెళ్ళండి

వీలయితే మీవెంట మరెవరినయినా తీసుకెళ్ళండి

అక్కడ మీకు పట్టెడన్నం లేక ఖాళీ కడుపుతో

గాయపడ్డ దేహాలు ఎదురు పడొచ్చు;

ప్రేమతో వాళ్ళని పలకరించండి,

మీకు ప్రేమతో కథలు చెప్పిన తాత, ముత్తాతలు, అవ్వలు

ఎదురు పడొచ్చు, వారితో కరచాలనం చేయండి,

వీలయితే ప్రేమగా గుండెకు హత్తుకోండి,

మీరు మనుషులను ప్రేమించండి;

మీరు మనసులని  ప్రేమించండి;

మానవ దేహాలని ధైర్యంగా ప్రేమించండి,

కొత్త లోకాన్ని నిర్మించొద్దు;

పాత లోకాన్ని అక్కున చేర్చుకోండి;

గాయపడిన గడప లుంటాయి,

వెల వెల బోయిన వీదులూ ఉంటాయి,,

గుడిలో గాలిగోపురాన్ని పలకరించండి,

ఊరిమధ్యలో ఉన్న వేపచెట్టు నీడలో

కాసేపు ప్రశాంతంగా సేదతీరండి,

ముందు మీ ఊరెళ్ళండి,

అక్కడ పాతతరం మనుషులుంటారు;

కొత్తతరం కోసం వేచి ఉన్న మనుషులుంటారు,

అందరి మధ్యా స్థూపంలా నిలబడి మమత,

అనురాగాలని పంచండి, పంజరం లోని పావురాల్ని

బయటకు వదలండి,

చేనులోకి (ని) పాలకంకు లని ముద్దాడండి;

మనషుల్లో, నిజ మానవుల్లో బ్రతుకు ప్రవహించాలంటే

ముందు మీ ఊరెళ్ళాలి; దానితో సహవాసం చేసి రావాలి;

అందుకే నామాట విని వెంటనే మీ ఊరెళ్ళండి;;;;;

—————————————శుభంభూయాత్‌—————————————