గెలుపు  (Author: రాంభక్త పద్మావతి)

గెలుపు జేబులో ఉంటుంది

గుండె గంతులేయదు

కనపడని ముల్లేదో

ఉండుండీ గుచ్చుతుంటుంది

వాదన

తారస్థాయికి చేరినపుడు

చెయ్యి పైన ఉండాలనే ఆరాటం

చూపుకు గంతలు కట్టేస్తుంది

మనసు నోరు మూసేసి

మెదడు మాట్లాడడం

ఆరంభిస్తుంది

అహమో గుడ్డితనమో

ఆకాశాన్ని మబ్బై కమ్మేసి

పెదవి పదునైన పలుకులను

అవిశ్రాంతంగా చల్లుతూ పోతుంది

దేహం ఎగిరెగిరి పడుతూ

ఎదురుగా ఉన్న శ్వాసను

నిర్ధాక్షిణ్యంగా బంధిస్తుంది

తీరా విజయం వరించాక

హృదయం

ఎంత పని చేశావని నిలదీస్తుంది

చేజేతులా

అనుబంధపు దారం

పుటుక్కున తెంపేసినందుకు

లోపల తుపాను మొదలవుతుంది

అన్నిసార్లూ

గెలుపు ఆనందాన్ని బహూకరించదు

జీవితంలో ఒక్కోసారి

ఓడిపోవడమే నిషానిస్తుంది.

******