నువ్వో స్వయంకృతాపరాధివి  (Author: చింతలపట్ల కళా గోపాల్)

జీవమైనా.. నీ జీవితపయనమైనా/

సాగిపోయేది ఆగిపోయేది నాలోనే..నాతోనేనని తెల్సినా/

కాకులు దూరని కారడవుల్ని మాయం చేస్తూ /

కొండల్ని బండల్ని పిండి చేశావు/

అమెజాన్ పొత్తిలిలో చిచ్చు పెట్టి../

మంచుదిబ్బల్ని మరిగించి ఎల్ నినోల్ని సృష్టించావు/

మైదానాల్ని మాగాణుల్ని స్వాహా చేస్తూ/

సాగరజలాల్లో ప్లాస్టిక్ గుట్టల్ని నిర్మించావు/

క్యుములోనింబస్ లను తరిమేసి/

చెత్త పర్వతాలు వెదజల్లే హైడ్రోకార్బన్స్ లతో రాకాసి జబ్బుల్ని అంటించి/

యురేనియం ధూళిపొగలతో నిండు జీవితాల ఊపిరి తీశావు!/

ఆహారపు గొలుసును పుటుక్కున తెంపి/

జలచక్రాన్ని దారి మళ్ళించావు/

అవని అంతా ఆమ్లవర్షాల్ని కురిపిస్తూ/

ఫ్లోరైడ్ నీటితో వంకర వేళ్ళను విస్తరించావు/

అదనపు దేహం పెంచలేని నా పరిమితి తెల్సీ/

గుక్కెడు నీళ్ళ ఊటా, చారెడు మెతుకులనిచ్చే/

అక్షయపాత్రను చేజార్చుకున్న అనాగరికుడా!/

పరిగెత్తిన మేరా నాదేనన్న దురాశతో సత్తువ సన్నగిల్లగా../

ప్రాణవాయువులింకిన సిమెంటు రాస్తాలలో /

అలసట చెందితే..ఇప్పుడే చెట్టునీడన కూలబడతావు?/

నేలతల్లి ఉసురు తగిలి నీ కుతంత్రాల బుర్ర/

వేయివక్కలవక మునుపే..

ఒక మొక్కైనా నాటి "మళ్ళీ చిగురించు..!"/

ఊడల ఉచ్చు బిగిసి నీ దేహపుటాకు/

మోడుగా మారక మునుపే..

వటవృక్షమై మళ్ళీ మొలకెత్తు..!!/