ఒంటరి విజయం
ఒంటరి విజయం (Author: గారపాటి సూర్యనారాయణ)
నా కంటే ముందే, అక్క ఈ భూమ్మీదకొచ్చినప్పుడు
ఆ కొద్ది సేపు, అమ్మ కడుపున ఒంటరినయిన ఫీలింగ్
ఏడుస్తున్న అక్కను, అమ్మ అక్కున చేర్చుకున్నప్పుడు
తదుపరి ఓదార్పు నాకేనని తెలిసినా, ఒంటరినయిన ఫీలింగ్
ఒంట్లో బాగోక అక్క, ఇంట్లోనే ఉండిపోయినప్పుడు
స్కూల్లో ఎందరో నా ప్రక్కనే ఉన్నా, ఒంటరినయిన ఫీలింగ్
చదువులో చురుకు లేక, ఒక క్లాసు వెనుకబడినప్పుడు
ఇన్నేళ్లుగా కలిసి చదివిన అక్క లేక, ఒంటరినయిన ఫీలింగ్
అర్థాంతర పెళ్ళితో, అక్కను అత్తారింటికి పంపేసినప్పుడు
పుట్టుక తోడు నాకిక లేదని తెలిసి, ఒంటరినయిన ఫీలింగ్
చదువు సాకుతో, ఇంటి నుండి దూరంగా వదిలేసినప్పుడు
నా చిన్ని ప్రపంచం నా నుండి వేరై, ఒంటరినయిన ఫీలింగ్
భారమైన చదువు బాధ, బంటుగాణ్ణి మింగేసినప్పుడు
నాకున్న ఏకైక మిత్రుడు దూరమై, ఒంటరినయిన ఫీలింగ్
ప్రాణంగా ప్రేమించిన ప్రియురాలు, ఛీత్కరించినప్పుడు
నా లోకం అంధకార బంధురమై, ఒంటరినయిన ఫీలింగ్
నా దేహంలో సగమైన అర్థాంగి, స్వర్గానికేగినప్పుడు
తోడు లేని బతుకు తెల్లారే దారి లేక, ఒంటరినయిన ఫీలింగ్
జీవన గమనంలో, ఎడారి పయనం నా వెంటే నిలుస్తుంది
నా అడుగులో అడుగై, ఒంటరితనం వెన్నంటే తరుముతుంది
ఒంటరిగా నిలుస్తున్న ప్రతి తరుణం, వెనువెంటనే మారుతుంది
సరిక్రొత్త తోడు రాకతో, మరో ఉదయం ప్రారంభమవుతుంది
ఆఖరి తోడును కోల్పోయిన నిజం, నాకిపుడు అవగతమవుతుంది
మరల మార్పు రాబోదను సత్యం, నగ్నంగా కనుపిస్తుంది
అయినా....
చిట్టచివరి శ్వాస వరకు, ఆనందంగా గడిపేస్తాను
ఈ లోకాన్ని ఒంటరి చేసేసి, విజయంతో అస్తమిస్తాను
2025 సంక్రాంతి సంచిక
అధ్యక్షుని సందేశం (TFAS అధ్యక్షుని సందేశం)
2025 సంక్రాంతి పోటీలలో బహుమతులు (మా సమాచారం)
ఘనంగా న్యూజెర్సీ తెలుగు కళా సమితి దీపావళి సంబరాలు (TFAS కార్యక్రమాలు)
స్వీయ శ్లోకాలు (ప్రత్యేక బహుమతి) (బాలలు)
యత్ర నార్యస్తు పూజ్యంతే - లక్ష్మీ గాయత్రి (మొదటి బహుమతి) (కథలు)
పల్లవించిన ప్రకృతి (మొదటి బహుమతి) (కవితలు)
అనాది ప్రేమికుడు (రెండవ బహుమతి) (కవితలు)
మనసు తలుపు గడియ పడితే ... (కథలు)
మర్యాదగానే ఒప్పేసుకుందాం... (కవితలు)
నీ చల్లని ఒడిలో సేదదీర్చవూ! (కవితలు)